Meri ek manpasand kurti hai
Jise na jaane kitne saalon se har doosre din
Main pehente aa rahi hun.
Ki taar taar ho chali hai.
Dhyaan se dekho
Toh chhote chhote
Aadhe tedhe
Chhed anginat ho chale hain,
Jinse dhoop aur baarish
Mujhse aksar roobaroo ho liya karte hain.
Ab to har baar pehnne se pehle
Ek baar dar lagta hai
Ki shayad is baar
Jab ise dhula jayega
To chal basegi ye,
Meri manpasand kurti.
Bas kuchh isi tarah, mera dil bhi hai.
Ise har baar dhul kar
Aangan mein sukha leti hun.
Sochti hun
Ab ise seva nivritt kar hi dun
Apni kurti ko
Aur koi nayi
Chamakti si
Ho sakta hai
T shirt le aaun iske badle?
Thodi 'modern' ho jaun?
Phir teh laga kar rakhi kurti par
Nazar pad jaati hai
Aur haath ruk nahin paate
Ek aur baar shayad
Pehen hi leti hun?
Ki jabtak phat kar do hisson mein
Ye is kaabil hi nahin reh jayegi
Ki ise pehna jaaye
Tab tak,
Kaise kisi aur ko almari ka vo kona saunp doon?
Bas kuchh isi tarah, mera dil bhi hai.
Ise har baar seene ke
Usi kone mein teh laga kar rakh deti hun.
Ki ummeed hai
Avaastavik si hi sahi
Ke shayad is kurti se pehle
Main hi chal basun?
Bas kuchh isi tarah, mera dil bhi hai.
Ise har baar lambi umr ki duaayein de
Khud ko pyaar na karne ki hidayat de deti hun.
Phir dhul kar
Aangan mein sukha leti hun.
Aur seene ke
Usi kone mein teh laga kar rakh deti hun.
Manpasand hone ka ise maine achha sila diya hai.
You've gracefully given words to your feelings. Best of all the lines is 'bas kuch isi tarah ,mera dil bhi hai'
ReplyDeleteLoved your way of writing.:)
Thank you! It means a lot to me that you read my blog! Now I know that at least someone in the family does :D
DeleteDo keep commenting on the posts, even the ones you don't like. Would love some criticism as well!!
:* :)